يوميات صايم ومصامشى

كابتن صايم راجل رياضى

كان لعيب كورة فى الماضى<>ودلوقت ياعينى قاعد فاضى

كابتن صــايم قـــام من الـنـــوم<>علشـان يتسحـر ويصــــوم

وقــــــال يـــــارب اتقبـــل منا<>والخيــــــر علينـــــا يــدوم

والصبح نزل ع القهوة<>قاعد هناك بالساعات

هو وصحابه بيحكوا<>ع الدورى وع البطولات

ولحد العصر قاعد <>بيتكلم عن المنتخب

وهزايم على أرضنا<>وحاجات ليها العجب

ولما ييجى العصر<>جرى على السرير

ظبط المنبه ع المدفع<>مظبوط من غير تأخير

ماهو عاوز يعجل بالفطر<>صايم بجد مش أى كلام

عمل اللى عليه وزيادة<>وأدى فريضة الصيام

ودعى يارب احيينا نصوم بكرة< >زى النهاردة تمام.


بعد الفطار لازم تمارين< >فوق وتحت واحد اتنين

بعديها يشغل التلفزيون< >يشوف الاهلى بيلاعب مين

بيتفرج ع الماتش ضرورى< >ومش مهم يصلى القيام

داحنا كده تمام التمام< >وكفاية علينا ثواب الصيام

خلص الماتش خلاص < >يلزمه بقى شوية راحة

آخ نسيت أصل صاحبنا< >عنده ماتش نهائى فى الساحة

لبس الفوتبول جرى بسرعة< >أصله يبقى الهداف

أول مانزل ضرب زميله< >والحكم شجاع مش بيخاف

اداله كارت احمر على طول< >وصحابنا قال مش معقول

ازاى تطردنى يا ابن ال..< >وشتايم بقى للفجرية

باظ الماتش علشان صاحبنا< >مكانش عنده روح رياضية


...........................................................................

الشخصية التانية

أستاذ صايم


أستاذ صايم مربى فضيل

مدرس كفء ملوش مثيل----وقنوع بيرضى بالقليل

م الفجر قايم للسحور

و ع المدرسة جرى وبسرعة----علشان يلحق الطابور

وقعد نايم طول الحصة----واهم حاجة يمضى حضور

وان حد من الطلاب ضايقه----أو كلمه يغضب ويثور

قال ايه الصيام ياعينى----بيخليه دايما متضايق

وخلص اليوم الدراسى----واستاذنا كان مش رايق

كان نفسه ينام كمان ساعتين----علشان فى الدرس يبقى فايق

ولما كان الدرس----كان عنده طالب غلبان

مدفعش فلوس الشهر----وابوه ياعبنى عيان

استاذنا غضب واتنرفز----وطرده من الدرس كمان

وقاله حرام علي----انت مش انسان

ازاى متدنيش حقى----واحنا فى رمضان


الجزء التانى

استاذ صايم عنده دروس----م المغرب لحد الفجرية

مشغول جدا اوى بدروسه----وكمان الطلبة عنده غبية

كان كل مايتنرفز يشتم----بعديها يستغفر ويتوب

أستاذنا معذور يا اخواننا----الواد ماسك الكتاب مقلوب

واللى بقاله سنتين بيعيد----والطلبة غبائهم بيزيد

والحصة خلصت علشان----بيتفقوا على المواعيد

استاذ صايم ضميره مظبوط----وبيعمل كل اللى عليه

ومش بياخد فى الحصة ----اكتر من عشرة جنيه

ولو واحد غلبان بيساعده----وبيخصملوا 50 قرش

وكمان سايب الطلبة براحتهم----يعنى عليهم مبيسألش

مديهم مطلق الحرية----يجى مايجيش هو حر

اهم حاجة فلوسه كاملة----يدفعهاله آخر الشهر